Rabu, 08 Juni 2011

PAGELARAN MUSIK & BUDAYA KARO


“TANEH KARO ERDILO”

4 Juni 2011 I Auditorium UKDW Yogyakarta

Salah sada ciri khas bumi merah putih eme kerina jelma masing-masing lit adat istiadat si jadi palas kegeluhen asum ersosialisasi sada ras sidebanna. Adat istiadat si ngajarken nilai-nilai etis gelah kerina erdalan alu ratur dingen la sikitiken ukur. I tuntut ngelestariken adat-istiadat si enggo i garami ras i terangi kata Dibata. Berkat arah kalimat sipeteluken enda, maka ersada arih anak perana singuda-nguda se-Yogyakarta erbahan sada moment si ngajuk kerina kalak Karo guna berefleksi kai-kai saja si harus i benahi i kuta kemulihen, Taneh Karo Simalem.

Sabtu 4 Juni 2011 ringan i auditorium UKDW Yogyakarta, undangen ras penonton konser masuk ku ruangen i iringi suling ras penganak. I lanjutken Kata sambuten arah ketua panitia Ezra Deardo Purba, Penasehat panitia Prof. Dr. KRT. Lucas Meliala, Sp. Kj. Sp. S (K), bagepe Rektor UKDW, Yogyakarata. I terusken ku pemutaren slide “Kalak Karo Si Nai”. Acara mengalir i temani cimpa bagepe lau inemen si nambahi ate tedeh nandangi Taneh Karo. Secara garis besar acara enda ibahan gelah kerina masyarakat Karo i Yogyakarta tetap mediate, nandangi kuta kemulihen. Mulih mbaba gelar sarjana banci mbangun Taneh Karo, bagepe budaya si lit terus i lestariken. Bencana sinabung si tampilken i slide, demonstrasi-demonstrasi si lit i Taneh Karo i tempilken sebagai landasan kerangka berpikir kondisi Taneh Karo genduari enda.

Acara sibagenda rupana harus tetap i dukung dingen i lesatariken gelah budaya Karo tetap tertata dingen terjaga. Nampilken musik khas Karo, Lagu-lagu, bagepe tarian lalit ketadingen dingen acara enda i kemas alu standar konser Nasional. Pelayanen si mbue melibatken PERMATA GBKP Yogyakarta enda cukup berkualitas dingen berbakat guna mereken talentana ibas acara enda, janah iarapken banci mbentuk sada tim guna banci ngiringi kebaktin Minggu GBKP Yogyakarta. GBKP eme Gereja Suku Karo si la sitik unsur-unsur budaya Karo ibas Gereja. Secara keseluruhen, GBKP si erdomisili ibas Kota Besar (Jakarta, Tangerang, Bandung, Medan, Semarang, Kalimantan, rsd) arus ikut muat bagin guna mpertahanken dingen ngajarken anak singuda denga gelah ula lupa adat istiadatna (sebab ironisna lit piga-piga teman-teman PERMATA si tading i kota, la beluh cakap karo, bahkan lit sibeluh tapi gengsi cakap Karo).

Tapi arah acara enda kerina kalangen (orangtua, PERMATA, bahkan si la kalak Karo) i undang guna nyaksiken kai-kai saja si lit ibas budaya Karo. Subuk tari kreasi Karo si peragaken Danov Ginting ras teman-teman. Tim Musik tradisional Karo Yogyakarta si peragaken Dieta Singarimbun ras teman-teman, bagepe piga-piga lagu Karo si i endeken Ivo perangin-angin ras teman-teman. Sekitar 450 kalak ndemi auditorium UKDW, Yogyakarta. Kerjasama ras GBKP Runggun Yogyakarta, Merga SilimaYogyakarta, Universitas Kristen Duta Wacana Yogyakarta, bagepe Institus Seni Yogyakarta acara enda erdalan alu mehuli. Undangen si ndemi kursi penonton konser pe reh arah Kota Bandung, Salatiga, Jember, bagepe Semarang. Antusiasme penonton ibas acara enda nandaken maka acara sibagenda rupana arus tetap i selenggaraken gelah kerina masyarakat Karo i taneh perlajangen mbaba ilmu si enggo i datna guna mbangun Taneh Karo Simalalen. Taneh Karo Erlebuh dingen ndilo kita guna mbaba perubahen si positif. Salam ibas kami nari panitia man kerina perpulungen GBKP ijapa pe kita ringan. Budaya Karo arus tetap ijaga dingen ilestariken bagepe tetap inklusif guna terwujud perdamen. “Proud To Be Karo”, nina kalak Seberaya. Am Gloria Dei.

Imanuel Ginting’s

(Ketua Ikatan Generasi Muda Karo, Salatiga)